Aloha pumehana e ka mea heluhelu,
E like me ka maamau (no na pule a 2 i hala ae nei) o ka hana ma ka Poaono, oia no ka haku mele hoomakeaka, kalailai ola paha. O ke kumuhana o keia pule, oia no ka holo paikikala a ka poe Kepani. He nui ino ka poe e hulo nei i ka hana maikai a ke Kepani, oia no ka malama ana i ka aina ma o ka holo paikikala ana. A he oiaio no ka waiwai o ia hana, aka no nae he pono ka hele nihi ana io ia nei. Mai ka wa o ko'u hoea ana mai i anei nei, a hiki i keia manawa ua heluia he 20 manawa a oi i aneane keia e hookui aku i kekahi kanaka, i kekahi kaa, i ole i hookuiia e ke kaaahi. Eia hou, o na keiki a me na opio, he holo wikiwiki wale ka lakou me ka nana ole i kahi a lakou e holo ai. Paa i ka pepeiao ka hua mele no laila, aole hiki ia lakou ka lohe i na ano kani o ke ao, a i kekahi manawa ua aneane lakou make! Aia paha kekahi poe e olelo ana, he poe akeakamai ke Kepani, hiki no ia lakou ke holo ma ia ano. Hoole aku au, aohe palekana! Eia no nae, pela ka nohona a e mau ana au i luna o ko'u paikikala aloha. He wahi mele keia e hoike ana i ke ano o ka holo paikikala. I ike oe, o ka "piupiu" he kani no ia i ka wa au e kali ana ma kekahi aoao o ke ala, aia a a ke kukui kupono i aeia ka holo ana, o ka piupiu ke loheia. Aka nohoi, aohe keia poe e hoolohe no ka mea, aneane makou apau o nei aina make i ka mea kalaiwa hupo!
He aha nei hana a ka paikikala
A ka nui lehulehu e kau ae nei
Holo ana hoi oe me ka noeau
O ka hookui nae kou hopena
Me ke kaa hoi e hookuku ana
Piupiu ke kukui, aohe palekana
Nana aku i na keiki e holo ino ana
Ikeia o Hawaii no e ka oi
Hainaia mai ana ka puana
Piupiu ke kukui, aohe palekana
No comments:
Post a Comment