He Mele

Aloha pumehana kaua,

O ka moolelo o keia la, ua pili no ia i ka halawai pu ana me na luna nui o ka aina maanei.  Na kekahi lala o ko makou keena i hapai mua maila i ka manao iau e mele i kekahi mele i ko makou wa e kipa ana i ke Kiaaina o Ehime.   Ua hoole mua au iaia aka, mahope o ka walaau liilii me kekahi hoa pili, ua hooholoia e aho ka loaa o ka ukulele no laila i hapai aku keia i ka ukulele a i ka hana i keia kakahiaka.

I ka hoea ana aku, ua puiwa na luna o ke keena i ka'u mea e hapai ana me ka i ana aku, "Aue, mele ana oe i keia la?" a he ike mai koe nohoi.  A hala ka aina awakea, niele hou maila a ua ae akula.  Noiia au e mele a o ko'u mele akula no ia i ka'u mele i haku ai na ka papa mele, oiai he mele kupono no ka pilina ma waena o Iapana me Hawaii, a he mele pilikino nohoi ia.  O ka hapa keia o ke mele a he olelo alai ka lakou.  Noi mai lakou e hoopokole au i ka'u mele.

Ua hoole akula au ia lakou me niele ana aku i ke kumu o ka lakou olelo ana me kela.  Wehewehe maila aole paha he nui ka manawa i hiki hui, no laila aole i lawa ka manawa e mele i ka mele holookoa.

Ua kupaa nae keia no ko'u mele me ka manao, i ole he hiki ke meleia ka mele holookoa, aole e loheia ka honehone o ka'u ukulele.  Aia a kukalaia keia manao i kimokimo ai ke poo o kahi luna me ka hoomaopopo.  Nolaila, ua makemake hoi au e waiho ka ukulele ma ke keena, eia nae ua paipai hou lakou e lawe i ka ukulele ina he lawa ka manawa e mele aku.  A oia no ka'u hana ai.

Ma mua iho o ka hui ana me ke Kiaaina, ua hemo ka ukulele iau mai loko mai o kona pahu malama, ina he manawa a laila e mele.  I loa no a noho ihola au o ka niele maila no ia a ke Kiaaina no ko'u makaukau ma ka ukulele, a hai aku au iaia ua makemake au e mele i kekahi mele.  Ae maila oia a mele akula au i ua mele nei.

Iau e mele ana ua ikeia ka hopohopo ma ke alo o ka'u mau luna no ka loihi o ke mele, aohe nae he hope e hoi aku ai, kupaa au ma ka'u olelo.  Pau ka mele i ka himeniia, a pai kii pu makou.  Ua haaheo no au iau iho no ke mele ana i ka'u mele i haku ai no ka hoohanohano ana i ka pilina o Iapana me Hawaii...a ua haaheo pu nohoi au i ko'u kupaa ana ma ko'u olelo.  Aole he kuemi wale i hope.  Oia no ko'u pahuhopu i ko'u ku ana mai maanei a ke hauoli nei ka naau i ka hookoia o ko'u makemake.

Mahalo a nui.