I Ka Olelo No Ke Ola

Aole maopopo iau ke ano o keia, aka he kiute.

Aloha pumehana kaua e ka mea heluhelu.

Aue, he nani keia la i ko'u ao ana i ke olelo Kepani!  He olelo noeao no o, I ka olelo no ke ola i ka olelo no ka make, a ua ola au i ka olelo i keia la...o ka olelo Kepani nohoi.  O ka olelo makuahine mau ana ka olelo ma ko'u puuwai, aka ua komo no ke aloha no ka olelo o ko'u mau kupuna i keia la.  Oiai aole i makaukau loa maua i ka olelo Kepani a pueko wale ka olelo, ua hoolalaia he mau papa olelo Kepani na maua e hooikaika i ka pilinaolelo.  He eha la, a he 3 hola o na la pakahi me ke kumu he alo a he alo a ua aapo kokeia he mau mea hou!  Aole o kana mai i keia makana a ke keena i hooili mai ai ma luna o'u, ua ke ao hou koke nei au i ka olelo!

Eia hou kekahi, na ko'u hoa hana i hapai akula i ka manao e hookomo maua i loko o kahi papa olelo Kepani me na poe no waho o Iapana e noho ana ma Ehime.  Ua hookomoia au ma ka papa C, a oia hoi ke kulana waena o ka olelo.  Aia i loko o ia papa he mau poe mai na aina like ole, oia no o Enelani oe, o Bulakila oe, a o Amerika hoi.  Ma kahi o 10 kanaka paha ka nui o ka papa, a ua nani no ka hui ana mahope no ka mea, aia he mau kanaka o ka olelo haole.

Maopopo loa, ua ahuwale ko'u hookae ana i ka olelo haole iwaena o kakou na poe olelo hawaii a i kekahi manawa, he poina koke hoi keia ka wa akahiakahi o ka olelo makuahine.  Ua ike iho nei au i keia mau la i hala ae nei, ina aole makaukau loa ma kekahi olelo, he hana nui ke komo piha ana i ua olelo nei.  Me ia mau manao, mahalo nui au i ka hoomanawanui o na kanaka i kue mua i ko'u paipai nui ana ia lakou e komo i ka olelo!  Eia mai ko'u manawa e hoomanawanui a e hookanaka hoi ma ka olelo Kepani.  Eia no nae, ua mahalo nui au i ka hui ana me ka poe olelo HAOLE maanei, no ka mea me he mea la, ua nele au i hoa kamailio a na lakou no i pani i ka hakahaka.  Manaolana, e lilo lakou i hoa no'u....he ike mai koe.

Oia mau no nae ko'u hao ana i ka aina aloha, aka i keia po ua ne maikai ka pilikia o ko'u naau.

Mahalo a nui.