Ae, i keia la ua ono loa neia opu i ke kili! O ka mea apiki nae, me he mea la aia au ma ka makeke i kela keia la, a malia paha ua luhi maila ka maka o kahi poe Kepani i ka ike mau ia oʻu. Ua lanakila no nae koʻu ono, a i laila aku nei keia i mea e kii ai i na mea e pono ai. Oi aku ka maalahi o ke kipa ana ma laila i keia mau la, no ka mea, maopopo iau ka nui o ka mea ai i hiki ke komo ia i loko o ka hinai i mua o koʻu paikikala, a ua piha maikai ka hinai i keia la i ka meaai.
I koʻu hoi ana i ka hale i hoomakaukau au i na mea apau e pono ai ke kili, alaila hoi i holo kekahi mea ino loa. Kuhihewa au, ea, aole i lawa ka aila o ka io i ole e papaa ka io ea, no laila ea, i ninini iki au i ka aila a hoomehana. I koʻu hookomo ana iho nae i ka io i loko o ka ipuhao me ka aila, o ka hoa ana maila no ia o ka ipuhao a he ahi e lapalapa nui ana i mua oʻu! Ua hoomanao koke aela au i ka haawina o na papa malama hale aina ma ke kulanui, a ua pono he pauka koka. AOHE KA! No laila i manao au, malia paha ina poi ia ka ipuhao, ua pau paha ke ahi...eia no nae he poi aniani wale no koʻu a he mea apiki loa kena!
Aka, i ka hopena, aohe koho...poi me ka poi aniani i ole, e make paha au a me na kanaka a pau i koʻu hana hupo. Ua poi ihola ka ipuhao a pau ke ahi, wehe houia a ua kapalili wale nei kino i ka nui makau.
Lanakila hou nae ka ono a ua hoomaka hou au i ke kili, a i keia manawa ke moni nei ka haae.
Mahalo a nui
No comments:
Post a Comment